Македонија продолжува да ја зацврстува финансиската стабилност и да се интегрира во европските платни системи, откако Народната банка демонстрира способност за брзо и одлучно реагирање во услови на глобална неизвесност. Ова беше истакнато на средбата помеѓу гувернерот на Народната банка, Трајко Славески, и директорката на Светската банка за Западен Балкан, Шјиаочјинг Ју, каде што посебно се разгледуваа ефектите од ескалацијата на кризата на Блискиот Исток и блокадата на Ормутската Теснина, кои предизвикаа раст на цените на енергијата и создадоа нови економски шокови.
Славески нагласи дека Народната банка постојано ја следи природата и влијанието на шоковите врз домашната економија. „За да ја заштитиме макроекономската стабилност и стабилноста на банкарскиот систем, потребни се кредибилна монетарна политика и ефикасни макропрудентни мерки“, рече тој, истакнувајќи дека институцијата досега успешно ги намалила инфлацијата и ја одржала финансиската стабилност. „Нашата цел останува обезбедување стабилност во динамичниот светски економски контекст“, додаде Славески.
Партнерството со Светската банка исто така доби посебен акцент, особено во рамките на проектот за модернизација на платните системи во Западен Балкан. На средбата беше потенцирано дека пристапувањето на Северна Македонија во Единствената област за плаќања во евра (СЕПА) во 2025 година веќе донесе конкретни економски придобивки: трошоците за трансфер се намалија за 80%, а надоместоците за трансакции од 20.000 евра паднаа од 0,33% на 0,04%. Според Шјиаочјинг Ју, ова значи дека регионалните земји од Западен Балкан можат да остварат заштеда од околу 0,6% од нивниот БДП, што е еквивалент на приближно 1 милијарда евра.
Сепак, придобивките од СЕПА не се само финансиски. Интеграцијата во европскиот платен простор значајно го подобрува квалитетот на прекуграничните плаќања, правејќи ги побрзи, поефикасни и по транспарентни за граѓаните и компаниите. Светската банка, како што беше нагласено, продолжува да ја поддржува Народната банка во имплементацијата на системот за брзо плаќање за домашни и регионални трансакции, како и во развојот на други инфраструктурни проекти што ја јакнат финансиската отпорност на земјата.
Особено внимание беше посветено на учеството на Народната банка во студијата за одржливост на корпоративниот сектор, спроведена во 2024 и 2025 година со поддршка на Светската банка. Новата аналитичка алатка овозможува детални системски анализи и супервизорски проценки, обезбедувајќи посилна рамка за решавање проблеми во банкарскиот сектор.
