Во услови на растечки тензии и потреси на глобалните енергетски пазари, Доналд Трамп наводно размислува за запирање на воените операции против Иран, дури и по цена клучниот Ормускиот Теснец да остане во голема мера нефункционален.
Според извештај на The Wall Street Journal, кој се повикува на извори од американската администрација, во Белата куќа преовладува проценка дека евентуална акција за целосно деблокирање на теснецот би значела значително продолжување на конфликтот, далеку над првично планираните четири до шест недели.
Наместо тоа, стратегијата се насочува кон побрзо постигнување на клучните воени цели: слабеење на иранските поморски капацитети и ограничување на ракетниот потенцијал, паралелно со обиди за смирување на судирите. Во исто време, Вашингтон планира да засили дипломатски притисок врз Техеран со цел да се овозможи нормален проток на трговијата низ овој витален морски коридор.
Доколку дипломатските напори не дадат резултат, американските власти размислуваат за алтернативно сценарио, префрлање на товарот врз европските партнери и земјите од Заливот, кои би требало да преземат водечка улога во обезбедување на слободна пловидба.
Во меѓувреме, последиците веќе се чувствуваат на светските пазари. Блокадата на Ормускиот Теснец, една од најважните артерии за транспорт на нафта во светот, придонесе цените на енергенсите нагло да пораснат. Цената на суровата нафта достигна околу 116 долари за барел, ниво блиску до највисоките од почетокот на конфликтот, што дополнително ја зголемува неизвесноста во глобалната економија.
