Иранските медиуми ги објавија клучните пораки од писмото на претседателот Масуд Пезешкијан упатено до американскиот народ, во кое тој ја нагласува историската позадина на недовербата меѓу Иран и САД.
Во писмото, Пезешкијан наведува дека Иран „никогаш не започнал војна“, посочувајќи дека пресвртна точка во односите била Државниот удар во Иран 1953, кој го опишува како „незаконска американска интервенција“ насочена кон спречување на национализацијата на иранските ресурси.
Тој додава дека односите меѓу двете земји претходно не биле непријателски, но дека недовербата дополнително се продлабочила поради американската поддршка за шахот, поддршката за Садам Хусеин, како и поради санкциите и воените дејствија.
Иранскиот претседател прави јасна разлика меѓу американската влада и народот, истакнувајќи дека граѓаните на САД, Европа и другите земји не ги смета за непријатели. „Претставувањето на Иран како закана не е во согласност со историските факти и реалноста“, наведува Пезешкијан.
Писмото доаѓа во време на зголемени тензии, откако американскиот претседател Доналд Трамп изјави дека иранското раководство побарало примирје, додавајќи дека САД ќе го разгледаат тоа прашање кога Ормутскиот теснец ќе биде „отворен и безбеден“.
Во својата порака, Пезешкијан не споменува евентуално примирје, но предупредува дека продолжувањето на конфликтот ќе има далекусежни последици. Тој ја критикува американската политика, оценувајќи ја како скапа и „апсурдна операција“, и обвинува дека САД дејствуваат како посредник на Израел.
„Светот се наоѓа на раскрсница – изборот меѓу конфликт и ангажман ќе ја одреди иднината на генерациите“, порачува иранскиот претседател, додавајќи дека Иран низ историјата опстанал и покрај бројни агресии.
Според аналитичарите, ваквото обраќање директно до американската јавност е невообичаено за Иран и се толкува како обид да се влијае врз јавното мислење во САД и индиректно да се поттикне прекин на огнот.
