Обединетите Арапски Емирати се подготвуваат да им се приклучат на САД и нивните сојузници во можна воена операција за отворање на Ормутскиот теснец, поради иранските блокади и напади, објави The Wall Street Journal.
Според извори на весникот, Емиратите веќе лобираат за резолуција во Советот за безбедност на ОН со која би се одобрила интервенција, а истовремено повикуваат на формирање меѓународна коалиција составена од западни и азиски сили.
Доколку се реализира ваквото сценарио, Емиратите би станале првата држава од Персискиот Залив која директно би влегла во конфликт по ескалацијата на нападите од страна на Иран.
Официјални лица оценуваат дека иранското раководство дејствува со став дека се бори за сопствен опстанок и е подготвено да го доведе во ризик и глобалното економско функционирање.
Како дел од предлозите, Емиратите предложиле и американските сили да преземат контрола врз стратешки острови во теснецот, вклучително и Абу Муса, кој со децении е под контрола на Иран, иако Емиратите го сметаат за своја територија.
Во меѓувреме, тензиите дополнително се зголемуваат откако Иран изврши серија напади врз Емиратите. Во последните денови биле лансирани десетици ракети и дронови, а вкупниот број на проектили што погодиле цели во Емиратите достигнува околу 2.500.
Аналитичарите предупредуваат дека евентуална воена интервенција во Ормутскиот теснец може да има сериозни последици врз глобалната економија и безбедноста во регионот.
…
