По истекот на петгодишниот мандат на претседателката Вјоса Османи, функцијата шеф на државата во Косово ја презеде претседателката на парламентот, Албулена Хаџиу, која ќе ја извршува должноста како вршител на должност претседателка.
Примопредавањето на функцијата се одржа на 4 април во официјална церемонија во кабинетот на претседателот, каде Османи формално ѝ ја предаде должноста на Хаџиу.
До ова доаѓа откако парламентот не успеа навреме да избере нов претседател, што создаде институционален вакуум, предвиден во Уставот да се пополни со преземање на функцијата од страна на претседателот на Собранието.
Според уставните одредби, Хаџиу може да ја извршува функцијата в.д. претседател најмногу шест месеци, односно до избор на нов шеф на државата.
Политичката ситуација во Косово останува сложена, бидејќи Собранието има рок до 28 април да избере нов претседател, согласно одлуките на Уставниот суд, по неуспешните претходни обиди за избор поради недостиг на кворум и политички несогласувања.
Вјоса Османи ја извршуваше функцијата претседател од април 2021 година, кога беше избрана со парламентарно гласање, и не успеа да обезбеди поддршка за нов мандат во актуелниот политички распоред.
Албулена Хаџиу, која е дел од движењето Самоопределување и актуелна претседателка на парламентот, сега привремено ќе ја извршува највисоката државна функција, што значи дека владејачката структура во Косово ги контролира трите клучни позиции – премиерската, претседателската и парламентарната функција.
Првите активности на Хаџиу како в.д. претседател веќе се најавени, при што таа ќе започне со официјални обврски веднаш по преземањето на функцијата.
Ситуацијата во Косово останува неизвесна, а наредните недели ќе бидат клучни за избор на нов претседател и стабилизирање на политичките процеси во земјата.
