Три лица загинаа, меѓу кои мајка и нејзиното бебе, откако огромно дрво се срушило врз група луѓе за време на велигденските празници во близина на градот Фленсбург во северна Германија. Несреќата се случила во неделата околу 11 часот наутро во местото Мителангелн, додека групата учествувала во традиционалната потрага по велигденски јајца во шумата.
Според полицискиот извештај, дрвото високо околу 30 метри паднало директно врз присутните. На самото место починале 21-годишна жена и 16-годишна девојка. 10-месечното бебе на починатата жена било пренесено со хеликоптер во болницата во Кил, но и покрај напорите на медицинскиот тим, подоцна му подлегнало на повредите.
18-годишна девојка се здобила со сериозни повреди и била итно оперирана во болницата во Хајде, додека останатите учесници во настанот се здобиле со полесни повреди. Точниот број на повредени сè уште не е објавен.
Причините за падот на масивното дрво не се познати, а надлежните служби засега го обезбедуваат местото додека трае истрагата за сите околности на несреќата, која многумина ја оценуваат како незапаметена трагедија.
