Ирачката државна компанија за трговија со нафта SOMO соопшти дека сите товарни терминали се целосно оперативни и дека испораките на нафта можат да продолжат непречено, откако Иран го ослободи Ирак од ограничувањата за премин низ Ормускиот теснец.
Иранскиот министер за надворешни работи, Абас Аракчи, истакна дека Ирак е ставен на листата на „пријателски“ земји заедно со Кина, Русија, Индија и Пакистан, чиј транспорт низ теснецот е слободен. На листата се додадени и земји од Југоисточна Азија, како Малезија, Тајланд и Филипини.
SOMO побара од производителите во рок од 24 часа да достават распоред за товарење, со цел да се обезбеди континуитет и стабилност на извозот. Според нив, сите терминали, вклучително и нафтениот терминал во Басра, функционираат нормално.
Иран ја презеде контролата над Ормускиот теснец по американско-израелските напади, воведувајќи ограничувања за пловила поврзани со САД, Израел и нивните сојузници. Сепак, властите нагласуваат дека преминот не е целосно затворен, туку ограничувањата важат само за „непријателски“ пловила.
Ирак, како втор по големина производител во ОПЕК, пред конфликтот извезувал околу 3,4 милиони барели нафта дневно, но производството падна на околу 800 илјади барели. Со нормализирањето на транспортот се очекува закрепнување на извозот. Во меѓувреме, низ теснецот веќе поминале неколку танкери, меѓу кои и малезиски брод со околу еден милион барели ирачка нафта, како и турски танкер, иако бројот на пловила сè уште е под вообичаеното ниво.
…
