Вашингтон денеска ја пречекува македонската делегација на високо ниво за втората сесија од стратешкиот дијалог со САД, четири години по последниот состанок. Македонската делегација, составена од владини претставници, ќе биде предводена од министерот за надворешни работи и надворешна трговија, Тимчо Муцунски. Со него ќе патуваат и министрите за внатрешни работи Панче Тошковски, за одбрана Владо Мисајловски, за дигитална трансформација Стефан Андоновски и министерката за енергетика Сања Божиновска.
Овој дијалог не е само формалност. Тој служи како платформа за продлабочување на соработката со САД во клучни области: од одбраната и безбедноста, преку сајбер-безбедноста и технолошката соработка, до економските и енергетските прашања. Дополнително, темите ќе опфатат заедничка борба против транснационалните закани и зајакнување на граничната безбедност.
Министерството за надворешни работи и надворешна трговија истакнува дека со организирањето на втората сесија се потврдува цврстината на сојузништвото и заедничката посветеност на стабилноста и просперитетот во регионот и пошироко.
Муцунски во интервју најави дека Македонија ќе биде првата европска земја што ќе учествува во стратешки дијалог со САД во рамки на оваа администрација. Тој очекува сериозни разговори кои ќе доведат до конкретни резултати во одбраната, безбедноста, економијата и трговијата, со директна корист за граѓаните.
