Премиерот Христијан Мицкоски изјави дека секое можно решение околу полагањето на правосудниот испит на албански јазик мора строго да се движи во рамките на Уставот и да биде усогласено со меѓународните критериуми. Тој нагласи дека политичките барања не можат да бидат над правниот поредок, потенцирајќи дека државата има обврска да постапува европски, односно со целосно почитување на правните норми.
Според него, актуелниот Закон за употреба на јазиците веќе е предмет на оценка пред Уставниот суд, особено во деловите што се однесуваат на правосудството и принципот на владеење на правото. Дополнително, како што истакна, постои и негативен став од Венецијанската комисија, која предупредува дека воведувањето двојазичност во судството може да создаде сериозни проблеми, од недостаток на ресурси до ризик од нееднаква примена на правдата.
Мицкоски посочи дека токму поради овие причини, меѓународните експерти препорачуваат враќање на претходното законско решение од периодот 2008–2009 година. Сепак, тој подвлече дека студентите кои студираат право на албански јазик имаат загарантирано право на образование на својот мајчин јазик, како дел од системот во земјава.
Во обид да се надмине спорот, веќе е формирана експертска комисија составена од уставни правници, која има задача да изнајде решение што ќе биде правно одржливо и меѓународно прифатливо.
Премиерот се осврна и на неодамнешните протести, оценувајќи дека тие добиле политичка димензија поради присуството на опозициски структури. Тој откри дека за ситуацијата биле информирани партнерите од НАТО и Европската Унија, при што, како што рече, обидите за политичка дестабилизација не наишле на поддршка кај меѓународните претставници.
