Глобалната економија се соочува со нови притисоци откако конфликтот на Блискиот Исток, кој предизвика сериозни нарушувања во снабдувањето со енергија. Извршната директорка на Меѓународниот монетарен фонд, Кристалина Георгиева, предупреди дека последиците од војната веќе се чувствуваат во светот и се очекува да ги забават економските перспективи и да ги поттикнат инфлаторните притисоци.
Централната точка на кризата е Ормушкиот Теснец, критичен канал за транспорт на приближно една петтина од глобалната нафта и гас. Иранската блокада на теснецот доведе до стопирање на милиони барели нафта, создавајќи најголем прекин во снабдувањето со енергија во последните години. Дури и ако конфликтот се смири брзо, ММФ веќе планира да ја намали прогнозата за глобален раст и да ја зголеми проекцијата за инфлацијата.
„Светот влегува во период на зголемена неизвесност. Геополитичките тензии, технолошките промени, климатските шокови и демографските трансформации создаваат сложена слика“, рече Георгиева. Без конфликтот, ММФ предвидуваше умерен раст од 3,3% во 2026 година и 3,2% во 2027 година, како дел од постепеното закрепнување по пандемијата. Сега, пак, се очекува ценовниот притисок да се зголеми, а економскиот напредок да се забави.
Дополнително, Георгиева потенцираше дека глобалното снабдување со нафта е намалено за околу 13%, а влијанието се шири и на гасот, хелиумот и ѓубривата, што дополнително ја компромитира стабилноста на меѓународните синџири на снабдување.
Решение за состојбата ќе се разгледува на пролетните состаноци на ММФ и Светската банка во Вашингтон следната недела, каде финансиските експерти ќе разгледуваат стратегиите за справување со економските последици од конфликтот и со идните глобални шокови.
