Денес премиерот Христијан Мицкоски и градоначалникот на општина Аеродром, Дејан Митески, направија увид во градежните активности на една од клучните сообраќајници во населбата Мичурин, улицата Симеон Кавракиров. Со тоа официјално беше означен стартот на долгочекуваната реконструкција, која има за цел значително да го подобри квалитетот на живот на локалното население.
Со должина од 485 метри, оваа улица претставува важна артерија низ која секојдневно се движи интензивен сообраќај. Реконструкцијата опфаќа целосна обнова на коловозот, изградба на безбедни тротоари и поставување нов асфалт. Во рамки на проектот, ќе се постават 3.950 квадратни метри нов асфалт и 2.305 квадратни метри бехатон тротоари, со вкупна инвестиција од 22.630.000 денари.
Премиерот Мицкоски нагласи дека ваквите проекти не се само инфраструктурни зафати, туку директно влијаат на квалитетот на секојдневниот живот на граѓаните.
„Општина Аеродром добива значајна додадена вредност преку проектите финансирани од Владата, со вкупна вредност над 130 милиони денари. Ова се докажува дека ветеното се реализира во пракса, и граѓаните можат да ја почувствуваат разликата“ изјави премиерот.
Тој се заблагодари на градоначалникот, локалните советници и пратениците за нивната посветеност во спроведувањето на инфраструктурните проекти, истакнувајќи дека динамиката со која се работи е охрабрувачка и ветува дека започнатите проекти ќе бидат завршени уште оваа година.
Градоначалникот Митески, пак, потсети дека реконструкцијата на улицата Симеон Кавракиров е дел од поширок инфраструктурен проект кој опфаќа вкупно 18 улици во општината, со комбинирана должина од 5,4 километри и вкупна вредност од 138 милиони денари.
„Ова е третата улица што се реконструира по ред. Двете претходни веќе се во тек, а очекуваме до крајот на летото сите 18 улици да бидат комплетно обновени. Општина Аеродром останува посветена на изградба на модерна, безбедна и функционална инфраструктура, во интерес на сите граѓани“ истакна Митески.
