Професорот Дарко Данев од Машинскиот факултет во Скопје влегува во трката за ректор на Универзитетот „Св. Кирил и Методиј“, претставувајќи се како кандидат кој целиот свој академски и професионален развој го изградил токму на УКИМ. Со мотото „Од УКИМ-набљудувач до УКИМ-создавач“, Данев ја започнува својата кампања, нагласувајќи дека универзитетот за него не е само институција, туку втор дом во кој ги поминал додипломските, постдипломските и докторските студии, како и целата академска кариера – од асистент до редовен професор.
Данев двапати бил декан на Машинскиот факултет, период во кој, како што посочува, биле воведени стипендии за најдобрите студенти и биле отворени лаборатории каде студентите работеле на реални проекти со компании, со што се доближувале до пазарот на труд. Неговото име студентите го поврзуваат и со масовни промоции и настани кои ја зајакнувале академската заедница и создавале чувство на припадност.
Во своите јавни настапи, Данев се навраќа и на студентските денови, кои ги опишува како период на интензивно учење, но и силни пријателства кои траат до денес. Тој посочува дека тогаш условите биле поинакви, без интернет и лесен пристап до литература, но токму тоа ја зајакнувало посветеноста и тимската работа меѓу студентите.
Професорот има и богато меѓународно искуство. Уште во 1991 година престојувал во САД, а подоцна се усовршувал во Шведска, Германија, Белгија и Јапонија. Дел од својата докторска работа ја реализирал на универзитет во Флорида, каде добил и понуда да остане како доцент, но одлучил да се врати во Македонија со цел да придонесе за развојот на домашното образование и научна мисла.
Пред да започне академска кариера, Данев работел и во приватниот сектор, како и во Сојузот на возачи на Македонија, каде на релативно млада возраст раководел со организација со широка мрежа низ земјата. Неговиот научен интерес е насочен кон конструкцијата на возилата, машинството и современите технологии, вклучително и примената на вештачка интелигенција.
Во својата програма како кандидат за ректор, Данев посебен акцент става на студентите. Предвидува целосна дигитализација на административните процеси, отворање платени работни места за студентите во рамки на универзитетот, воведување универзитетски стипендии врз основа на интерно тестирање, како и поголема поддршка за студентските клубови и активности. Дополнително, предлага воведување на „студентско вето“ за клучни прашања поврзани со студентскиот стандард, како и подобрување на условите во студентските бифеа.
Неговата визија вклучува и поголема транспарентност при распределбата на студентските размени и засилена меѓународна соработка, со цел УКИМ да се позиционира како современ и отворен универзитет.
На крајот, Данев испраќа јасна порака дека студентите се клучот за иднината на државата, нагласувајќи дека улогата на универзитетот е да создаде услови младите да останат и да градат кариера во Македонија, наместо да заминуваат во странство.
…
