Американскиот претседател Доналд Трамп објави дека САД ќе ги запрат бомбардирањата и нападите врз Иран во период од две недели“, под услов Техеран веднаш и целосно да го отвори Ормутскиот теснец, клучна точка за глобалното снабдување со нафта.
Трамп претходно постави рок до 20 часот по вашингтонско време Иран да го отвори теснецот, заканувајќи се со жестоки последици доколку тоа не се случи.
Според иранските власти, Иран тврди дека САД веќе прифатиле план од 10 точки за решавање на спорот. Во исто време, Израел наводно се согласил на двонеделно примирје со Иран.
Иранското Врховно тело за национална безбедност соопшти дека преговорите за прекин на огнот ќе се одржат во Исламабад, главниот град на Пакистан, во рок од најмногу 15 дена, со цел да се финализира договорот.
Според тврдењата од Техеран, САД се обврзале да гарантираат дека нема повторно да извршат „агресија“, да дозволат продолжување на иранската контрола врз Ормутскиот теснец и да прифатат обогатување на ураниум. Дополнително, договорот наводно предвидува укинување на санкциите, повлекување на резолуции од меѓународни институции и исплата на отштета.
Во пакетот мерки се споменува и повлекување на американските сили од регионот, како и прекин на конфликтите на повеќе фронтови.
Во меѓувреме, американски претставник изјави за медиумите дека прекинот на огнот би можел да започне уште вечерва по американско време, но дека ќе биде потребно време наредбите да стигнат до сите единици на терен.
Белата куќа потврди дека се разгледуваат можности за директни преговори со Иран, но нагласи дека конечна одлука сè уште не е донесена и дека исходот останува неизвесен.
…
