Во период од само 24 часа, граничните премини Табановце и Богородица забележале исклучително засилен сообраќај, при што државата ја напуштиле вкупно 16.014 македонски државјани. Податоците на МВР, доставени до Press24, се однесуваат на интервалот од 9 април во 12:00 часот до 10 април во 12:00 часот.
Најголемиот товар од заминувањата го понел преминот Табановце, каде се евидентирани 9.150 излегувања на македонски државјани. Во истиот период, преку овој премин во земјата влегле 3.158 граѓани, додека кај странските патници се регистрирани 7.360 влезови и 5.449 излези.
Значителен проток е забележан и на јужната граница. На Богородица, 6.864 македонски државјани ја напуштиле државата, а во обратен правец се вратиле 1.394. Податоците дополнително покажуваат и активен сообраќај на странски државјани, со 4.753 влезови и 5.070 излези.
Засилено движење на патници има и на останатите гранични премини кон југ. На Дојран во истиот 24-часовен период се регистрирани 546 излегувања на македонски државјани, додека на Меџитлија границата ја преминале 832 лица кои излегле од државата.
Овој нагло зголемен интензитет на патувања се совпаѓа со стартот на целосната примена на новиот систем за влез во Европската Унија. Станува збор за дигитален режим кој постепено се воведува на надворешните граници на ЕУ и предвидува електронска евиденција на патниците од земји што не се членки, како и собирање биометриски податоци, вклучително отпечатоци од прсти и фотографија.
Од Министерството за внатрешни работи порачуваат дека се ангажирани сите расположливи капацитети за да се забрза протокот на патници на границите, но истовремено предупредуваат дека новите правила може да предизвикаат подолги задржувања при влез во Европската Унија.
