Заменик-претседателот на Владата и министер за транспорт, Александар Николоски, порача дека градежната динамика на автопатските делници што ги реализира конзорциумот „Бехтел и Енка“ не само што не забавува, туку напротив, значително се засилува, со истовремено зголемување на бројот на ангажирани работници.
Според него, активностите на терен бележат јасен и мерлив раст, а споредбените податоци покажуваат дека работите се изведуваат со значително поголем интензитет од претходно. Како што наведе, во декември 2024 година биле реализирани градежни активности во вредност од 10,7 милиони евра, додека една година подоцна таа сума достигнала 19,1 милион евра, разлика што, како што рече, јасно ја отсликува засилената динамика на проектите.
Трендот на зголемена активност, според него, продолжува и во следните месеци: јануари 2025 година носи реализација од 9,7 милиони евра, наспроти 12,2 милиони евра во јануари 2026 година, додека февруари од 8,5 милиони евра лани се зголемува на 13 милиони евра годинава.
Николоски посочи дека ваквите показатели се поткрепени и со официјалната статистика, според која градежниот сектор бележи двоцифрен раст во последните квартали – 21 отсто во третиот и 16,7 проценти во четвртиот квартал од минатата година.
Тој додаде и дека Министерството за транспорт моментално бележи реализација на капиталните инвестиции од над 70 проценти, што го оцени како историски висок резултат. Очекувањата се, како што истакна, со претстојниот ребаланс на буџетот да се обезбедат дополнителни средства, кои би овозможиле продолжување на засилениот инвестициски циклус.
„Овие средства се трошат со висока динамика, што е позитивен сигнал за економијата и за развојот на државата“, порача Николоски, оценувајќи дека се работи за досега една од најуспешните фази во реализацијата на инфраструктурните проекти.
