Во обид да го ублажи ударот од наглото поскапување на енергенсите врз аграрниот сектор, Владата на Федерацијата Босна и Херцеговина реши директно да интервенира. Од државните резерви ќе бидат распределени дури 2,5 милиони литри дизел за земјоделците, токму во екот на пролетната сеидба.
Оваа мерка доаѓа како одговор на алармот што го вклучија земјоделските здруженија, кои предупредија дека цените на горивото и ѓубривата се и до 50 проценти повисоки споредено со истиот период лани. Барањето беше упатено до премиерот Нермин Никшиќ и федералната влада, а реакцијата, барем според првичните оценки, е навремена.
„Станува збор за значајна помош која може да направи разлика на терен. Сега клучно е распределбата да се спроведе брзо, бидејќи сеидбата веќе е во тек“, нагласи Неџад Биќо. Тој очекува надлежното министерство во најкус можен рок да ги утврди критериумите и механизмите за распределба.
Паралелно со оваа одлука, владата отвори уште еден фронт за стабилизирање на пазарот. Прифатена е иницијатива за привремено укинување на царините за увоз на нафта и нафтени деривати од земји кои не се дел од Европската Унија, ЦЕФТА или други договорни партнери на БиХ. Предлогот предвидува целосно укинување на 10-процентната царина во период од шест месеци.
Иницијативата ќе биде испратена до Советот на министри, со барање да се изработат измени во царинската тарифа што ќе овозможат нулта стапка за ваквиот увоз во наредните 180 дена.
