Унгарија денес гласа на едни од најнеизвесните избори во последните години, избори што можат да стават крај на 16-годишното владеење на премиерот Виктор Орбан, но и да предизвикаат пошироки политички потреси во Европа и пошироко. Од раните утрински часови низ целата земја се забележуваат долги редици пред гласачките места, а излезноста е значително повисока во споредба со претходните избори, што според аналитичарите укажува на силна мобилизација на гласачите.
До 13 часот, според официјалните податоци, гласале повеќе од половина од вкупно 7,53 милиони гласачи, односно 54,14 проценти, што е значително зголемување во однос на изборите во 2022 година, кога во истиот период излезноста изнесувала 40,01 процент. Само до 11 часот веќе биле регистрирани 37,98 проценти, што покажува дека интересот за гласање е исклучително висок уште од раните часови.
Најголема излезност е забележана во Пешта, каде над 58 проценти од гласачите го искористиле своето право на глас, додека најниска имало во округот Саболч-Сатмар-Берег, каде сепак се бележи раст од околу 10 процентни поени во споредба со претходните избори.
Зголемувањето на излезноста е евидентно низ целата земја, што укажува на зголемена политичка напнатост и важноста на овие избори.
Покрај домашната сцена, голем интерес има и кај унгарските гласачи во странство. Долги редици се забележани во градови како Малага, Стокхолм, Копенхаген, Осло и Минхен, каде што на некои места гласачите чекале повеќе од еден час. Во одредени случаи, приоритет имале граѓаните кои однапред купиле авионски билети и допатувале исклучиво за да гласаат.
Во меѓувреме, изборниот ден не поминува без тензии и меѓусебни обвинувања. Опозицијата обвинува за купување гласови, тврдејќи дека на гласачи им биле нудени околу 30.000 форинти (приближно 80 евра) за поддршка на владејачката партија Фидес. Од друга страна, власта возвраќа со контраобвинувања, тврдејќи дека токму опозицијата стои зад поголем дел од пријавените неправилности. Според претставници на Фидес, досега се регистрирани стотици случаи на изборни нерегуларности, а дел од нив веќе се предмет на полициски истраги.
Поради овие сомнежи, изборите ги следат стотици меѓународни набљудувачи, меѓу кои и европратеници, но и набљудувачи поврзани со различни политички групи. И власта и опозицијата имаат воспоставено сопствени канали за пријавување нерегуларности, што дополнително ја подгрева атмосферата.
Опозицискиот лидер Петер Маѓар порача дека ќе ги прифати резултатите само доколку изборите бидат фер и демократски, додека од владејачката страна доаѓаат предупредувања за можни тензии доколку исходот биде оспорен.
Портпаролот на Орбан, Золтан Ковач, дури предупреди и на можни безбедносни ризици, обвинувајќи ја опозицијата дека подготвува сценарија за дестабилизација.
Во ваква напната атмосфера, премиерот Виктор Орбан ги повика граѓаните масовно да излезат на гласање, нагласувајќи дека високата излезност има јасна порака. „Многу луѓе гласаат. Ова значи само едно: ако сакаме да ја заштитиме безбедноста на Унгарија, ниту еден патриот не смее да остане дома“, порача Орбан.
Овогодинешните избори се сметаат за клучен тест не само за Унгарија, туку и за политичките текови во Европа, со оглед на тоа што резултатот може да има влијание врз односите во Европската Унија, но и врз пошироките геополитички позиции.
