Американската медиумска куќа CNN во својот туристички осврт ја издвојува North Macedonia како една од најатрактивните, но недоволно откриени дестинации во Јужна Европа, која нуди разновидни природни пејзажи, богата гастрономија и автентична културна традиција без масовен туризам.
Во текстот се посочува дека додека најголемиот дел од туристите во Европа се насочени кон Франција, Шпанија и Италија, Македонија претставува алтернатива за патници кои бараат поинакво и поавтентично искуство. Земјата е опишана како планинска дестинација со зелени падини, карпести предели и разновидни природни сцени кои се менуваат од регион во регион.
CNN ја нагласува и богатата гастрономска понуда, со традиционални јадења кои се разликуваат од долина до долина, како и поволната сончева клима која овозможува развиено земјоделство и производство на квалитетни вина, особено во регионот Тиквеш.
Во текстот се издвојуваат и Скопје со Старата чаршија, кањонот Матка, националните паркови и винските региони како главни туристички атракции. Според медиумот, комбинацијата од историја, природа и културни влијанија ја прави земјата компактна, но исклучително содржајна дестинација.
Посебен акцент се става и на традиционалната храна, како ајварот, бурекот, пастрмалијата и ќебапите, како и на ракијата, која е дел од локалната културна и гастрономска традиција. CNN наведува дека токму овие елементи, заедно со гостопримството и зачуваните обичаи, ја прават Македонија атрактивна за сè поголем број патници кои бараат автентични доживувања.
…
