Петер Маѓар, новиот премиер на Унгарија, за кратко време прерасна од речиси непознат јавен лик во најсилниот политички фактор во земјата, ставајќи крај на долгогодишното владеење на Виктор Орбан.
Роден во конзервативно семејство во Будимпешта, Маѓар уште од младост покажувал интерес за политика. По студиите, градел кариера како дипломат поврзан со Европската унија, а по враќањето во Унгарија во 2018 година извршувал високи функции во државни институции и компании.
Долго време бил дел од круговите блиски до власта на Орбан, но неговиот јавен пробив дојде во 2024 година, кога политички скандал ја потресе земјата. Тогаш Маѓар излезе во јавноста со критики кон системот и брзо стекна огромна поддршка, организирајќи масовни митинзи и градејќи имиџ на човек подготвен за промени.
Со преземањето на партијата „Тиса“, тој успеа за кратко време да изгради силна политичка структура. На изборите, неговото движење освои убедливо мнозинство во парламентот, што се смета за историски пресврт во унгарската политика.
Маѓар се позиционира како конзервативец со поинаков пристап од Орбан. Тој најави враќање на поблиски односи со Европската унија, отклучување на замрзнатите европски фондови и намалување на зависноста од руската енергија. Воедно, најави и силни антикорупциски мерки и приклучување кон Европското јавно обвинителство.
Во надворешната политика, ветува дека Унгарија ќе биде сигурен партнер во НАТО и ЕУ, но ќе задржи прагматичен однос со Русија. Истовремено, задржува цврсти ставови за миграцијата и внимателен пристап кон проширувањето на Унијата.
И покрај поддршката, дел од аналитичарите се скептични дали Маѓар, како поранешен дел од системот на Орбан, ќе може целосно да го демонтира моделот што самиот го познава одвнатре. Сепак, за многумина во Унгарија, тој претставува најголема надеж за политичка промена по повеќе од една деценија.
…
