Глобалните пазари повторно се соочуваат со силен притисок откако САД најавија поморска блокада во Ормуски теснец, што веднаш предизвика нагло зголемување на цените на нафтата.
Цената на суровата нафта од типот Брент скокна за околу девет проценти и достигна речиси 104 долари за барел, додека утринските тргувања покажаа стабилизација на околу 102 долари. Истовремено, раст е забележан и кај американската нафта ВТИ, што укажува на засилена нервоза кај инвеститорите.
Овој развој следува по неуспешните преговори меѓу САД и Иран, со што пропаднаа надежите за смирување на конфликтот и стабилизирање на пазарите. Само неколку дена претходно, цената на Брент беше околу 95 долари, а за време на краткото примирје дури падна и под 90 долари.
Американскиот претседател Доналд Трамп најави дека блокадата ќе започне во 16 часот по средноевропско време. Според планот, ќе се ограничи движењето на бродови поврзани со иранските пристаништа, додека останатиот поморски сообраќај ќе продолжи без пречки.
Вашингтон со оваа мерка има за цел да го намали влијанието на Техеран врз трговијата и да го ограничи приходот од извоз на нафта. Иран, како еден од најголемите светски производители, силно зависи од овој теснец за транспорт на своите енергенси.
Ормускиот теснец се смета за една од најважните енергетски рути во светот, па секоја закана или ограничување во неговото функционирање директно се одразува врз цените на нафтата, а со тоа и врз инфлацијата и економската стабилност во Европа и пошироко.
