Во Грција, дел од земјоделците влегоа во велигденските празници со разочарување, откако државните субвенции не беа исплатени во целосен обем. Иако во средата и четвртокот пред Велики петок биле префрлени околу 202 милиони евра кон 128.063 корисници, тој износ е значително помал од приближно 460 милиони евра кои, според очекувањата, требало веќе да бидат распределени.
Зад доцнењата стои голема административна промена во системот за исплати на земјоделска поддршка. Улогата на поранешната агенција OPEKEPE постепено ја презема AADE, која во новиот модел настапува со многу построг пристап и засилени проверки, особено по неодамнешни злоупотреби и скандали.
Поради тие контроли, дел од исплатите се ставени на чекање, бидејќи податоците на апликантите се проверуваат од почеток. Тоа создава значително забавување во системот, а во исто време ја зголемува нервозата кај земјоделците, кои сметаат дека повторно се казнуваат и чесните заради малцинството што направило злоупотреби.
Дополнителна компликација е тоа што институцијата сè уште е во процес на добивање официјална сертификација од Европската унија за да може целосно да управува со земјоделските плаќања. Во меѓувреме, при деталните проверки биле откриени десетици илјади потенцијално сомнителни барања, што законски бара дополнителна верификација и уште повеќе го забавува процесот.
Во меѓувреме, политичките реакции не изостануваат. Од опозициската ПАСОК посочуваат дека земјоделците ја носат тежината на државните пропусти, критикувајќи дека и последната рата исплатила само дел од проблемот, без да ја стабилизира ситуацијата на терен.
Предходно, непосредно пред да ја напушти функцијата, министерот Костас Циарас потпишал мерка со која се привремено се стопираат казните додека трае проверката на податоците, со цел да се избегне дополнително незадоволство кај производителите.
Во меѓувреме, новиот ресорен министер Маргаритис Схинас, ја започнал својата дипломатска агенда со посета на Брисел, каде што разговарал за забрзување на процесот, придружуван од шефот на даночната администрација Јоргос Пицилис.
И покрај уверувањата од владини извори дека процесот наскоро ќе се нормализира и дека новиот систем ќе добие европско одобрување, земјоделците засега остануваат во неизвесност, со блокирани или делумно исплатени субвенции и без јасен рок кога целосно ќе се стабилизира системот.
