Новата европска дигитална платформа за влез и излез од Шенген зоната (ЕЕС), замислена како чекор кон побрзи и посигурни гранични проверки, наместо олеснување донесе сериозни застои и оперативни проблеми уште на самиот старт од примената.
Наместо очекуваната ефикасност и укинување на класичните печати во пасошите, аеродромите низ Европа се соочуваат со спротивен ефект: долги редици, забавени проверки и доцнења што во некои случаи траат со часови. Патниците остануваат заглавени на граничните точки, а дел од нив дури пропуштаат и свои летови поради бавната обработка на биометриските податоци.
Авиокомпаниите алармираат дека ситуацијата веќе не може да се третира како привремен „детски болест“ на нов систем. Според нив, проблемите укажуваат на подлабоки, структурни слабости во имплементацијата, кои директно ја нарушуваат функционалноста на европскиот воздушен сообраќај.
Како еден од најдрастичните примери се наведува инцидент на аеродромот во Милано, каде на лет кон Манчестер успеале да се качат само мал дел од патниците, додека поголемиот број останал блокиран на граничните проверки. Последиците за патниците се сериозни: од дополнителни финансиски трошоци за нови билети, до часови, па и денови изгубени во патување.
Иако идејата за дигитализација и засилена безбедност на надворешните граници на ЕУ добива широка поддршка во авиоиндустријата, реалноста на терен покажува дека постојната инфраструктура не е подготвена за ваков обем на обработка во периоди на зголемен сообраќај.
Затоа, здруженијата на авиопревозници упатуваат итен повик до Европската комисија за воведување на „флексибилен пристап“, вклучително и можност за привремено ограничување или паузирање на системот во делови од мрежата. Според нив, само таков чекор може да спречи дополнително влошување на состојбата во претстојната летна сезона, кога патничкиот сообраќај традиционално достигнува врв.
…
