Пред Велигденските празници, инспекциските служби на Агенцијата за храна и ветеринарство (АХВ) спроведоа масовна акција на терен со 1.221 вонредна контрола насочена кон сите алки во синџирот на исхрана. Резултатот од засилените проверки откри серија сериозни пропусти кај дел од операторите со храна, што доведе до изрекување парични казни во висина од над 19 илјади евра во денарска противвредност.
Во рамки на акцијата, од промет се повлечени и уништени над 272 килограми небезбедни прехранбени производи, најголемиот дел од животинско потекло. Дополнително, спречен е и обид за внес и дистрибуција на повеќе од 40 тони небезбедни јајца од соседна Србија, кои биле нештетно уништени на депонијата „Дрисла“.
Инспекциите регистрирале низа неправилности: од храна со истечен рок, преку користење замрзнато месо (т.н. триминг) во готови месни производи, до несоодветно означување на артикли и други пропусти во работењето. Како резултат на утврдените состојби, издадени се 35 решенија за отстранување на неправилностите и изречени се шест опомени.
Покрај тоа, контролите откриле и посериозни прекршувања на законските обврски: седум објекти работеле без регистрација во АХВ, тројца оператори немале спроведено задолжителни здравствени прегледи за вработените и не ги исполнувале основните услови за стручно ракување со храна, додека кај 13 оператори биле утврдени незадоволителни хигиенски и технички услови во објектите.
…
