Црногорскиот бизнисмен Светислав Филиповиќ (47) е уапсен во рамки на голема меѓународна полициска операција на Европол, насочена кон разбивање на мрежа за трговија со дрога и оружје. Во акцијата биле приведени најмалку 14 лица, а запленети се околу 4,5 тони наркотични средства во повеќе одвоени случаи.
Филиповиќ, кој е сопственик и управител на компанијата „Спектакулар“, официјално регистрирана за трговија со банани и јаткасти плодови, е осомничен дека стои зад организирана криминална структура. Според црногорските медиуми, компанијата бележела значителен промет и имала повеќе банкарски сметки, кои сега се блокирани со вкупен износ од речиси 5 милиони евра.
Податоците од платформи за анализа на глобалната трговија покажуваат дека фирмата примила 139 пратки од добавувачи од Еквадор, Колумбија и Украина, поврзани со 16 различни компании.
Од Полициската управа во Црна Гора соопштија дека Филиповиќ е осомничен за трговија со дрога и оружје, како и за раководење со криминална група која делувала на повеќе континенти.
Во рамки на операцијата, спроведена во Црна Гора и Германија со поддршка на Европол, биле запленети околу 4,5 тони дрога. Меѓу нив се 2,7 тони кокаин запленети во Боливија, како и 1,8 тони наркотични средства во Европа, вклучувајќи канабис, хашиш и кокаин.
Вкупно 14 лица се опфатени со истрагата, од кои дел се уапсени во Црна Гора, а дел во Германија, додека истражните органи продолжуваат со расчистување на случајот кој се поврзува со меѓународна криминална мрежа.
…
