Проектот за изградба на колектор за отпадни води и пречистителна станица во Тетово, кој беше најавен уште во 2023 година како едно од клучните инфраструктурни решенија за неколку тетовски села, сè уште не е влезен во фаза на реална изведба, иако од локалната власт уверуваат дека процесот конечно се придвижува.
И покрај повеќекратните најави и отворања на постапки, тендерската процедура за избор на изведувач беше повторувана неколку пати и досега не резултираше со почеток на градежни активности. Тоа доведе до значително доцнење на целиот проект, кој првично беше претставен како приоритетен.
Градоначалникот на Општина Тетово, Билал Касами, денеска изјави дека постапката е во завршна фаза и дека е избран оператор и за главниот колектор и за пречистителната станица. Според него, во моментов течат жалбените рокови, по чие завршување се очекува потпишување на договорот и официјално ангажирање на изведувачот.
Касами нагласи дека веднаш по завршување на правните постапки ќе следи и теренска мобилизација на компанијата, со очекување градежните работи да започнат во текот на летните месеци. Тој додаде дека институциите веќе се усогласени околу следните чекори за имплементација.
Во меѓувреме, според него, значаен дел од одложувањата се поврзани и со административни и имотно-правни процедури. Во координација со Делегацијата на Европската Унија, Министерството за финансии и Министерството за животна средина, било инсистирано да се заврши процесот на експропријација на трасата на колекторот. Во таа насока, во надлежните институции биле доставени околу 1.400 предмети за експропријација во релативно краток временски период.
И покрај првичните очекувања дека проектот ќе стартува порано, честите поништувања на тендерите и долготрајните административни постапки значително го пролонгираа неговото спроведување, оставајќи го на чекање еден од најавуваните еколошки проекти во општината.
…
