Американска морнарица ги отфрли тврдењата за недостиг на храна и лоши оброци на воените бродови „УСС Абрахам Линколн“ и „УСС Триполи“, нагласувајќи дека екипажите добиваат доволно и нутритивно избалансирани оброци.
Од Канцеларијата на началникот на поморските операции соопштија дека извештаите за наводен недостиг се неточни и дека здравјето и благосостојбата на морнарите и маринците остануваат врвен приоритет. Според нив, морнарицата располага со силна логистичка мрежа, а повремените промени во менито се дел од редовното прилагодување на условите за време на мисиите на море.
Во официјалните реакции се наведува дека двата брода имаат доволни резерви за обезбедување „здрави опции“, при што секој член на екипажот добива целосно порционирани оброци. Истовремено, беше потврдено дека привремената суспензија на поштенските пратки кон воените бази, воведена поради безбедносни причини, е укината.
Реакцијата на морнарицата доаѓа по објави на фотографии на социјалните мрежи, кои предизвикаа загриженост кај семејствата на војниците распоредени на Блискиот Исток. Тие тврдеа дека порциите биле ограничени и дека имало недостиг од свежа храна, особено за време на подолги мисии.
Дополнителна загриженост предизвика и привременото запирање на испораките на пошта од страна на Поштенска служба на САД, поради што дел од пратките со основни производи не стигнале до воените бази.
И покрај официјалните уверувања дека состојбата е стабилизирана, дел од семејствата продолжуваат да изразуваат сомнежи за условите во кои работат војниците, особено во контекст на долготрајните операции и ограничените услови на море.
…
