Владата на денешната седница донесе одлука за продолжување на мерката за намалување на акцизите на нафтените деривати, која ќе важи до 4 мај, со цел ублажување на економските притисоци и стабилизирање на цените на пазарот.
Според владините пресметки, се очекува Регулаторна комисија за енергетика да донесе одлука за дополнително намалување на малопродажните цени на горивата во просек за околу 1,5 денар по литар.
Со продолжувањето на мерката останува во сила намалувањето на акцизата за дизел горивото за 4 денари по литар, како и намалувањето за бензините од 95 и 98 октани за 2 денари по литар. Од Владата посочуваат дека оваа интервенција има директен ефект врз намалување на трошоците за живот и амортизирање на инфлаторните притисоци.
Покрај тоа, донесена е и одлука за измена на повластената стапка на ДДВ, со која стапката од 10 проценти ќе продолжи да важи за бензините, додека за останатите производи се враќа редовната стапка од 18 проценти.
Во соопштението се нагласува дека Владата останува посветена на внимателно балансирање меѓу поддршката на граѓаните и одржувањето на фискалната стабилност, при што ќе продолжи со следење на состојбите и навремено реагирање.
Истовремено, останува во сила и договорениот механизам со нафтените компании, кој предвидува дополнително намалување од 3 денари по литар за дизелот и 2 денари по литар за бензините. Со тоа се постигнува кумулативен ефект на намалување на цените, што директно влијае врз транспортните трошоци и економската стабилност.
…
