Премиерот Христијан Мицкоски изрази изненадување и незадоволство поради, како што рече, исклучително нискиот интерес за гласање на македонските државјани кои се пријавиле за претстојните избори во Бугарија.
Тој посочи дека разликата меѓу официјалните бугарски наративи и реалните бројки е очигледна, алудирајќи на честите тврдења за постоење на околу 200.000 Бугари во Македонија, наспроти само 210 пријавени гласачи.
„Ако навистина зборуваме за таква бројка, тогаш овие 210 пријави за гласање зборуваат сосема друга приказна“, истакна Мицкоски, коментирајќи го изборниот процес во соседна Бугарија.
Во својата изјава, премиерот се осврна и на очекувањата од идното политичко раководство во Софија, нагласувајќи дека Македонија посакува партнер кој ќе биде цврсто ориентиран кон европската агенда и регионалната стабилност.
Според него, клучно е новата влада да ја стави европската перспектива во преден план, како и да работи на унапредување на добрососедските односи и соработка.
„Очекуваме лидерство кое ќе ги следи Копенхагеншките критериуми и ќе ја поддржува европската интеграција, наместо да се задржува на отворени прашања од минатото“, додаде Мицкоски, повикувајќи на политика насочена кон иднината и заедничките европски вредности.
…
