Гужвите на европските аеродроми и гранични премини не попуштаат откако на 10 април започна целосната примена на новиот систем за влез и излез (EES), а според стручњаците, вистинскиот притисок допрва претстои со стартот на летните патувања.
Новата регулатива, која се однесува на построга контрола на државјаните од таканаречените трети земји, меѓу кои се и државите од регионот, веќе предизвикува подолги чекања и застои на клучните гранични точки низ Европа.
Ситуацијата, сепак, би можела дополнително да се искомплицира кон крајот на 2026 година, кога се очекува да биде воведен и системот ETIAS: електронска авторизација за патување во Шенген зоната. Иако не се третира како класична виза, овој механизам ќе претставува дополнителен безбедносен филтер за влез во европските држави.
ETIAS ќе важи за граѓани на околу 60 земји и ќе биде задолжителен услов за влез во 30 европски држави, меѓу кои членките на Европската унија, но и Норвешка, Швајцарија и Исланд. Апликацијата ќе се поднесува онлајн, со цена од околу 20 евра, а одобрението ќе важи до три години или до истекот на пасошот.
Иако постапката најчесто ќе трае неколку минути, во одредени случаи одобрувањето може да се пролонгира и до 14 дена, па дури и подолго. Дополнително, добиената дозвола нема да гарантира автоматски влез, бидејќи конечната одлука останува кај граничните службеници.
Според најавите, патниците со одобрена ETIAS дозвола ќе можат да престојуваат до 90 дена во рамки на период од 180 дена, но и понатаму ќе бидат предмет на дополнителни проверки при влез.
Експертите предупредуваат дека паралелното функционирање на EES и ETIAS, без единствена и целосно интегрирана платформа, може да создаде дополнителни тесни грла на границите, особено во периоди на зголемен туристички сообраќај како празниците и летната сезона.
Од туристичките кругови веќе апелираат патниците да се информираат навреме и да аплицираат веднаш штом системот стане оперативен, за да избегнат непотребни доцнења и компликации при патување.
…
