Советот на Европската Унија направи клучен чекор кон поостра и поусогласена борба против корупцијата, усвојувајќи ново заедничко законодавство што воведува унифицирани правила за дефинирање и санкционирање на коруптивните дела. Со оваа одлука, ЕУ испраќа јасна порака дека различните правни стандарди меѓу земјите-членки повеќе нема да бидат пречка за ефикасно гонење на ваквите престапи.
Новите прописи ќе станат правно обврзувачки дваесет дена по нивното објавување во Службениот весник на Унијата, по што започнува да тече рокот од две години во кој националните законодавства ќе треба да се усогласат со европските правила.
Во фокусот на реформата се наоѓаат клучните облици на корупција: од поткуп и злоупотреба во јавниот и приватниот сектор, до тргување со влијание, попречување на правдата и незаконско стекнување имот. Целта е овие дела да се третираат на сличен начин во сите земји-членки, со јасно утврдени санкции.
Предвидените казни не се симболични: за најтешките случаи се пропишуваат затворски казни од најмалку три до пет години. Покрај индивидуалната одговорност, сериозен товар ќе сносат и компаниите вмешани во коруптивни активности. Тие може да бидат казнети со милионски глоби, до пет проценти од нивниот глобален приход или до 40 милиони евра.
Пакетот мерки оди чекор подалеку од казнувањето. Земјите-членки ќе мора да воспостават специјализирани тела посветени на спречување на корупцијата, како и да вложат во подигнување на јавната свест. Со тоа, Брисел настојува не само да санкционира, туку и системски да ја намали појавата што со години ја поткопува довербата во институциите.
…
