Жителите на најголемата германска покраина Северна Рајна-Вестфалија испратија силен сигнал во неделата, откако на референдум со јасно мнозинство ја поддржаа идејата областа Рур да се вклучи во трката за домаќин на Олимписките и Параолимписките игри.
Според податоците на германското национално олимписко и спортско здружение (DOSB), околу две третини од гласачите, 66 проценти од излезените, се изјасниле „за“ кандидатурата. Поддршката не била рамномерна низ целиот регион, но во дури 16 од вкупно 17 општини резултатот бил позитивен, со што е исполнет клучниот услов за продолжување на проектот.
Единствената општина каде што иницијативата не добила мнозинство е Хертен, кој првично бил планиран како една од локациите за натпреварите во планински велосипедизам. По негативниот исход од гласањето, таа општина е повлечена од концептот на кандидатурата.
Со оваа поддршка, проектот „Келн–Рајна–Рур“ останува во игра, но конечната одлука дали ќе биде официјален германски кандидат ќе ја донесе DOSB во септември. Во внатрешната трка се уште неколку силни градови: Минхен, Хамбург и Берлин. Минхен веќе обезбеди поддршка од граѓаните, Хамбург ќе се изјасни кон крајот на мај, додека Берлин се откажа од референдум, но останува меѓу потенцијалните кандидати.
Во пошироката слика на Олимпиското движење, познато е дека Летните олимписки игри во 2028 година ќе се одржат во Лос Анџелес, додека домаќин на изданието во 2032 година ќе биде Бризбејн. Германија, пак, со своите кандидатури се обидува да се позиционира за некое од следните изданија меѓу 2036 и 2044 година.
…
