Постојаните врнежи од дожд што траат од вчера попладне во дебарскиот регион предизвикаа серија помали, но чести одрони на повеќе патни правци, што дополнително ја отежнува сообраќајната слика во овој дел од државата. Надлежните служби апелираат до возачите на зголемена претпазливост и строго придржување до поставената сигнализација.
Од Јавното претпријатие задолжено за одржување на магистралните и регионалните патишта преку својата дебарска секција соопштуваат дека теренските екипи континуирано интервенираат на повеќе локации, каде што поради натопеното тло доаѓа до одронување на камења и земја. Според нив, ваквите појави се очекувани за дел од критичните планински делници.
„Се работи за мали, но повторливи одрони, а коловозите се влажни и лизгави, па затоа апелираме за максимална внимателност во возењето“, посочуваат од службата.
Под нивна надлежност се над 110 километри патна мрежа, меѓу кои правците Дебар – Маврово, Дебар – Струга, патот кон граничниот премин Блато, како и поврзувањата кон Мала Река и Центар Жупа. На терен се ангажирани екипи кои работат на постојано расчистување и обезбедување на патиштата со цел сообраќајот да се одвива без поголеми прекини.
Најизразени проблеми со одрони се забележуваат на делницата Дебар – Маврово, особено во реоните кај Рајчица, Косоврасти, Јанче и Ростушки Мост, како и во близина на Бигорскиот манастир. На патот кон Струга како најризична точка се издвојува локалитетот „Три чешми“.
И покрај предизвиците што ги носи врнежливото време за сообраќајот, од надлежните институции истакнуваат дека дождот има и позитивни ефекти. Се очекува подобрување на хидролошката состојба и зголемување на нивото на Дебарското Езеро, што директно придонесува и за стабилизирање на резервите на вода за хидроелектраната „Шпиље“.
Паралелно со тоа, врнежите се оценуваат како корисни и за земјоделскиот сектор, особено за развојот на житните култури и подготовките на земјиштето за претстојната пролетна сеидба.
…
