Секоја година на 22 април, светот ѝ оддава почит на планетата на која сите живееме. Денот на планетата Земја денес претставува едно од најголемите глобални еколошки движења, во кое учествуваат милиони луѓе од речиси секој агол на светот.
Неговите почетоци датираат од 1970 година, кога американскиот сенатор и екологист Гејлорд Нелсон, заедно со студентот од Харвард, Денис Хејс, ја покренаа иницијативата да се подигне јавната свест за состојбата на животната средина. Нивната идеја произлезе од растечката загриженост за индустриското загадување и сериозните еколошки штети во САД, меѓу кои особено се издвојува големото излевање на нафта во Санта Барбара во 1969 година.
Она што започна како локална, граѓанска реакција, брзо прерасна во национално движење кое ја отвори вратата за нов вид еколошка свест. Целта беше јасна: да се стави заштитата на природата во центарот на политичката и општествената агенда.
Во текот на следните децении, Денот на планетата Земја ја надмина границата на САД и стана вистински глобален феномен. Од 1990 година официјално се одбележува на меѓународно ниво, со учество на стотици милиони луѓе во повеќе од стотина држави. Денес, бројот на учесници се проценува на над една милијарда ширум речиси 200 земји.
Секоја година овој ден носи нова тематска порака, насочена кон најитните еколошки предизвици. Во последно време, во фокус се климатските промени, намалувањето на пластичниот отпад и заштитата на биодиверзитетот.
…
