Австрија викендов ќе ја отвори новата сезона во ФИА Европскиот шампионат на ридски патеки (EHC), а вниманието повторно е насочено кон Игор Стефановски – Иџе, кој влегува во првата трка на легендарниот Рекберг со јасна порака: годината носи посебна тежина и дополнителна мотивација.
Македонскиот ас ја стартува 2026 сезона во момент кога бележи импресивен јубилеј од 25 години активна тркачка кариера. Тој период не само што го потврди како еден од најуспешните возачи од регионот, туку и како трикратен европски шампион кој и понатаму останува меѓу главните имиња во ова елитно натпреварување.
Новата сезона во EHC носи сериозен предизвик: над 250 возачи, 10 трки низ Европа и уште посилна конкуренција од претходните години. Сепак, Иџе повторно пристапува со препознатливата смиреност и амбиција, насочен кон високи пласмани и борба за врвот.
Во сабота започнуваат официјалните тренинзи на патеката Рекберг, додека главните трки се закажани за недела, 26 април. Завршницата на шампионатот традиционално ќе се одржи во Хрватска во септември.
Оваа сезона Стефановски повторно ќе настапува во соработка со Ferrari, возејќи го моделот Ferrari 488 Challenge, специјално адаптиран болид за ридски патеки, кој и годинава треба да му обезбеди конкурентност на највисоко ниво.
„Со голема возбуда ја очекувам првата трка. 25 години на патеките се огромен мотив да дадеме максимум. Верувам во добри резултати и силна сезона. Благодарност до тимот, Ferrari, спонзорите и сите кои стојат зад нас“, порача Стефановски пред стартот на шампионатот.
Поддршката не изостанува ниту од тимот на Видеолотарија Касинос Австрија, кои повеќе од една деценија се дел од неговата приказна и, како што истакнуваат, остануваат горди што заедно со него ја претставуваат Македонија на европската сцена.
…
