Заменик-началникот на Главната воено-политичка дирекција на вооружените сили на Русија и командант на специјалните сили „Ахмат“, Апти Алаудинов, изјави дека вкупните загуби на украинската армија од почетокот на војната се приближуваат до два милиони луѓе.
Како што пренесе руската агенција ТАСС, Алаудинов навел дека проценките се базираат на долгорочно следење на состојбата на теренот.
– Грубо може да се процени дека загубите на Украина во изминатите четири години достигнуваат околу два милиони луѓе. Пред неколку месеци бројката беше околу 1,7 милиони, но поради интензитетот на борбите таа продолжува да расте – изјави Алаудинов.
Според него, во овие бројки не се вклучени само загинатите, туку и тешко ранетите и оние кои трајно се онеспособени за враќање на фронтот.
Од друга страна, официјалните власти во Украина досега немаат дадено потврда за ваквите тврдења, а независни извори често посочуваат дека бројките за загубите во војната значително варираат и тешко можат прецизно да се утврдат во услови на тековен конфликт.
Извештаите за бројот на жртви остануваат предмет на спротивставени информации меѓу завојуваните страни, додека борбите на фронтот продолжуваат со непроменет интензитет.
…
