Повеќе училишта во неколку хрватски градови се најдоа на мета на лажни дојави за наводно поставени експлозивни направи, што предизвика итна реакција на полицијата и привремено прекинување на наставата.
Инцидентите биле регистрирани во Карловац, Пула, Шибеник, Сплит и Загреб, каде што во текот на денот пристигнале заканувачки електронски пораки упатени до училишта и полициски управи. Според информациите од надлежните служби, содржината на пораките укажувала на наводно поставени бомби во објектите.
Веднаш по добивањето на дојавите, полициските екипи биле распоредени на терен и заедно со раководствата на училиштата започнале детални проверки на просториите со цел да се утврди нивната безбедност.
Слични случаи биле пријавени и во десетици училишта во Пула и Шибеник, додека претходно вакви закани предизвикале прекин на наставата и во дел од средните училишта во Сплит, како и во образовни институции во Загреб и Дубровничко-неретванската жупанија.
Поради повторувањето на лажните дојави, образовниот процес во одредени региони во последните денови бил привремено суспендиран, додека истрагата за потеклото на пораките продолжува.
…
