Полскиот премиер Доналд Туск отвори сериозно безбедносно прашање за иднината на Европа, предупредувајќи дека клучната дилема за континентот е дали Соединетите Американски Држави ќе останат целосно посветени на обврските од членството во НАТО во случај на директна руска агресија.
Во разговор за „Фајненшл тајмс“, Туск оцени дека токму оваа неизвесност е „најважното и најтешкото прашање“ со кое се соочуваат европските држави. Според него, довербата во колективната одбрана не смее да се зема здраво за готово, особено во услови на зголемени тензии на источното крило на Алијансата.
Тој предупреди дека во Полска и соседните земји постои растечка загриженост дали НАТО е навистина подготвен, и политички и оперативно, да реагира брзо и решително доколку Русија изврши напад врз членка на Алијансата. Во таа насока, Туск посочи и на инциденти од минатата година, кога руски беспилотни летала навлегле во полскиот воздушен простор, тврдејќи дека реакцијата на дел од сојузниците била недоволно сериозна.
„Ова не е прашање за далечна иднина, туку за многу блиска перспектива“, истакна тој, додавајќи дека за земјите од регионот е од суштинско значење да имаат јасна слика за тоа дали обврските во рамките на НАТО навистина ќе се спроведат во пракса.
И покрај критичниот тон, Туск нагласи дека Полска останува близок партнер на САД и дека односите меѓу Варшава и Вашингтон се на високо ниво. Сепак, како што рече, суштинското прашање не е политичката декларација, туку реалната реакција во момент на криза.
Тој изрази надеж дека членот 5 од Северноатлантскиот договор, кој предвидува заедничка одбрана на секоја нападната членка, и понатаму ќе остане неприкосновен темел на Алијансата, и ќе функционира без двоумење кога тоа ќе биде најпотребно.
…
