Сојузот на стопански комори алармира дека воведувањето на ЕЕС системот на грчките гранични премини може да предизвика сериозни застои во текот на летната сезона, доколку не се одложи неговата имплементација.
Од ССК веќе доставиле барање до грчките власти за привремено одложување на системот, со цел да се избегне метежот кој се очекува поради зголемениот број туристи од Македонија и Србија.
Во емисијата „Бизнис 21“ на ТВ21, претседателот на туристичко-угостителската комора при ССК, Аркан Керим, предупреди дека во спротивно, граѓаните би можеле да се соочат со екстремно долги задржувања на границата.
„Имаме поддршка од северна Грција и од хотелиерите за ова барање. ЕУ дозволува во одредени ситуации привремено замрзнување на системот. Во спротивно, ќе се соочиме со сериозен проблем. За еден автомобил со четиричлено семејство ќе бидат потребни околу 10 минути за проверка, што значи дека за еден час ќе можат да поминат само неколку возила. Тоа може да резултира со чекања од 10 до 12 часа, а можно е и повеќе“, изјави Керим.
Тој посочи дека аеродромите имаат подобра инфраструктура за вакви проверки, но дека ситуацијата на копнените гранични премини е значително поразлична, особено во периоди на зголемен сообраќај кон туристичките дестинации во Грција.
