Скопје на 1 септември ќе ја добие првата линија од Градскиот воз – проект кој се најавува како клучен чекор кон модернизација на јавниот превоз и намалување на загадувањето, соопшти вицепремиерот
Александар Николоски.
Според најавите, првата линија ќе ги поврзува Зелениково, Драчево, Лисиче, Кисела Вода, Аеродром и новата железничка станица во Скопје. Работите се во напредна фаза, а се очекува трасата да биде завршена до крајот на јуни, по што линијата ќе биде ставена во функција од почетокот на септември.
Николоски истакна дека станува збор за еден од најзначајните инфраструктурни проекти во транспортот, кој иако не е голем по обем, ќе има сериозно влијание врз секојдневниот живот на граѓаните.
„Овој проект ќе помогне во намалување на загадувањето, ќе го промени начинот на живот во приградските населби и ќе поттикне користење на јавниот превоз наместо автомобили. Тоа е модел кој веќе функционира во најголемите европски градови“, нагласи тој.
Покрај градскиот воз, Владата работи и на модернизација на железничкиот сектор. МЖ Транспорт веќе потпишал договор со компанијата ЕВОР за набавка на најмалку пет нови товарни локомотиви, а паралелно се водат разговори со Светската банка за обезбедување нови патнички возови.
Во наредниот период се планира и проширување на мрежата со уште две линии. Едната ќе се движи од новата железничка станица преку Бутел и Скопје Север до Ѓорче Петров, а другата од истата станица преку Автокоманда и Маџари до Илинден. Проектирањето се реализира во соработка со Градежниот факултет, а тендерите се очекуваат во втората половина од годинава.
Според најавите, овие линии би требало да бидат завршени до крајот на 2027 или почетокот на 2028 година.
Како дел од поширокиот пакет мерки за подобрување на јавниот превоз, најавено е дека Скопје веќе оваа есен ќе добие и 100 електрични автобуси, што дополнително ќе придонесе за намалување на загадувањето.
Проектот за Градски воз се гледа како долгорочно решение за транспортните проблеми во главниот град, со цел Скопје да се приближи до европските стандарди за ефикасен, одржлив и модерен јавен превоз.
