Македонската репрезентација до 18 години на 30 април ќе одигра контролен натпревар против селекцијата на Србија, кој ќе се одржи во Стара Пазова, со почеток во 12:00 часот.
Овој пријателски дуел претставува уште една важна проверка за младите македонски фудбалери, во период кога тимот полека се подготвува за вклучување во новиот натпреварувачки циклус под капата на УЕФА. Од септември, оваа генерација ќе се натпреварува во квалификациите за пласман на Европско првенство за селекции до 19 години.
Селекторот Димитар Капинковски за ова гостување во Србија одбра состав од 19 фудбалери, сите од домашното првенство. Поради клупски обврски, дел од играчите не беа во можност да се стават на располагање, па списокот не го опфаќа целокупниот потенцијал на генерацијата.
Во ростерот се вклучени двајца голмани: Александар Трајков (АП Брера) и Антони Трајковски (Вардар).
Одбранбената линија ја сочинуваат Стефан Секирски (Новаци), Виктор Мачовски, Андреј Димовски (двајцата од АП Брера), Цека Назиф (Шкендија), како и Стефан Јорданоски и Стефан Стаматоски (Вардар).
Средниот ред е најбројната линија со Славчо Мисајловски (Тетекс), Јован Мрмачовски (Пелистер), Бојан Велков и Габриел Талески (АП Брера), Давид Ангелески (Пелистер) и Флори Иљази (Шкендија).
Во нападот Капинковски смета на Иво Марковски (Вардар), Дамјан Буцевски (Македонија ЃП), Матеј Сејменов и Иван Танчев (АП Брера), како и Мартин Џангаровски (Македонија ЃП).
…
