Европската Унија подготвува значајно заострување на правилата за патување со миленичиња, мерка што ќе воведе појасна граница меѓу приватниот превоз на животни и нивниот комерцијален транспорт. Според информации објавени од германскиот автомобилски портал „ADAC“, новата регулатива предвидува дека во едно приватно возило ќе може да се превезуваат најмногу пет домашни миленици.
Целта на ова ограничување е да се спречат злоупотреби и да се обезбеди поголема контрола врз движењето на животни низ земјите членки, особено во случаи кога транспортот наликува на професионална, а не приватна активност.
Покрај квантитативното ограничување, новите правила носат и проширени административни барања. Пасошот за миленичиња останува клучен документ за патување, но во иднина ќе биде дополнет со подетални податоци, меѓу кои и попрецизно наведување на земјата на потекло на животното.
Основните здравствени услови, како микрочипирање и задолжителна вакцинација против беснило, остануваат непроменети. Сепак, регулативата воведува и нови протоколи, особено при влез на животни од земји надвор од Европската Унија, како и во ситуации кога милениче е одбиено во трета држава и мора да се врати назад во ЕУ.
Според „ADAC“, дел од мерките веќе се во примена, додека постепеното воведување продолжува: од 1 октомври 2026 година ќе станат задолжителни новите здравствени сертификати, а целосно ажурираните пасоши за миленичиња ќе почнат да важат од 1 јануари 2028 година.
…
