Изјавата на германскиот канцелар Фридрих Мерц дека делови од украинската територија би можеле да бидат изгубени во евентуален мировен договор со Русија, предизвика бурни реакции во Киев и отвори нова дебата за компромисите што би можела да ги направи Украина на патот кон Европската Унија.
Поранешната портпаролка на украинскиот претседател Володимир Зеленски, Јулија Мендел, оцени дека пораката на Мерц претставува своевиден притисок врз украинското раководство, посочувајќи дека станува збор за став кој подолго време циркулирал неофицијално во европските политички кругови.
Говорејќи пред студенти во германскиот град Марсберг, Мерц изјави дека очекува Украина најпрво да постигне прекин на огнот, а потоа и мировен договор со Москва. Тој не ја исклучи можноста дел од територијата да не остане под украинска контрола, нагласувајќи дека евентуалната одлука ќе бара силна поддршка од јавноста.
Според него, доколку украинските власти се решат на таков чекор, истовремено ќе треба да обезбедат јасна перспектива за членство во Европска Унија. Сепак, Мерц посочи дека брз влез во Унијата е нереален, особено додека трае војната и додека не се исполнат клучните критериуми за владеење на правото и борба против корупцијата.
Како преодно решение, германскиот канцелар предложи Украина да добие статус на набљудувач во одредени европски институции, без право на глас – идеја која, според медиумите, веќе била разгледувана на состаноци на европските лидери.
Во меѓувреме, украинските власти предупредуваат на засилени офанзивни активности од страна на руските сили долж фронтот, додека Киев продолжува со напорите да ја зачува меѓународната поддршка и да го забрза својот европски пат.
