Овогодинешната воена парада на Црвениот плоштад во Москва, со која Русија традиционално го одбележува 9 Мај: Денот на победата над нацистичка Германија, ќе помине без вообичаената импресивна колона од тенкови, ракети и друга тешка воена техника.
Руското Министерство за одбрана соопшти дека, поради тековната оперативна состојба поврзана со воените активности во Украина, оваа година нема да биде прикажана воена механизација. Наместо тоа, фокусот на настанот ќе биде ставен на пешадиските формации и различните родови на вооружените сили.
На парадата ќе маршираат кадети од високи воени училишта, како и припадници на повеќе гранки на руската армија. Дел од воено-образовните институции, пак, нема да земат учество во годинешната свеченост.
Иако отсуствуваат традиционалните механизирани колони, парадата нема да биде без воена демонстрација на сила. Според најавите, ќе бидат вклучени Стратешките ракетни сили, Воздушно-космичките сили и единици од Воено-поморската флота, додека воената авијација ќе изведе прелети над Москва, формирајќи ги боите на руското знаме на небото.
Паралелно со свечениот тон на настанот, официјалните пораки ќе ја нагласат и улогата на руската армија во она што Кремљ го нарекува „специјална воена операција“ во Украина.
…
