Трагичен инцидент се случи во индиската сојузна држава Керала, откако храмскиот слон по име Mayyanad Parthasarathy излегол од контрола и предизвикал вистински хаос кој траел речиси два часа, при што едно лице го загубило животот.
Според информациите, слонот се ослободил во близина на храм, најверојатно под стрес предизвикан од бучавата и големата гужва. Во еден момент ги скинал синџирите со кои бил врзан и започнал неконтролирано да дивее, превртувајќи автомобили и уништувајќи сè што ќе му се најде на патот.
Во инцидентот загинал возачот на камионот кој го донел животното на церемонијата, откако бил фатално повреден за време на хаосот.
Надлежните служби успеале да го запрат разјарениот слон дури откако биле употребени средства за смирување, по што животното било седирано и ставено под контрола.
Случајот повторно ја отвори дебатата за безбедноста при користење на слонови на јавни настани во Индија, особено во услови на гужва и високо ниво на бучава, кои можат да предизвикаат стрес и непредвидливо однесување кај овие животни.
