Вселенскиот патријарх Вартоломеј денеска повторно ќе застане пред грчките пратеници, овојпат на свечена и специјална седница на Парламентот во Атина, настан кој веќе е најавен како „од историско значење“.
Поканата за неговото обраќање ја упати претседателот на Парламентот Никитас Какламанис, а во пленарната сала се очекува присуство и на грчкиот државен врв, меѓу кои и претседателот Константинос Тасулас. Самото одржување на говорот доаѓа во чувствителен геополитички момент, кој во Атина го поврзуваат со ескалациите на Блискиот Исток и продолжената војна во Украина, околности кои, како што наведуваат од Парламентот, му даваат дополнителна тежина на денешниот настан.
По завршувањето на обраќањето, Вартоломеј ќе биде одликуван со Златниот медал на грчкиот Парламент, едно од највисоките признанија на оваа институција.
Ова не е единственото признание што го добива поглаварот на Вселенската патријаршија во Атина. Само ден претходно, градоначалникот на градот Харис Дукас му додели медал за „Заштита на еколошкото наследство“, награда што се доделува на личности и организации со особено значајни достигнувања во областите на екологијата, одржливиот развој и борбата против климатските промени.
…
