Во време на нова ескалација на трговските тензии меѓу Вашингтон и Брисел, претседателката на Европската комисија, Урсула фон дер Лајен, изјави дека Европската унија нема намера да отстапи од постојните договори со САД, откако американскиот претседател Доналд Трамп најави можност за воведување високи царини на европските автомобили.
Повод за реакцијата беа изјавите од Вашингтон за потенцијално зголемување на царините до 25 проценти за возила произведени во ЕУ, потег што во Брисел се толкува како сериозен притисок врз веќе кревките економски односи меѓу двете страни.
Од Ереван, каде што се одржуваше самитот ЕУ–Ерменија, Фон дер Лајен настапи со остар, но внимателно формулиран став. Таа нагласи дека меѓународните договори не се предмет на политички импровизации и дека нивната суштина лежи во стабилноста и заедничките правила.
„Договорите се јасни и обврзувачки. Тие носат предвидливост и заеднички просперитет“, порача таа, додавајќи дека Европската унија останува подготвена за секој можен развој на настаните.
Сличен тон дојде и од претседателот на Европскиот совет, Антонио Кошта, кој истакна дека европските лидери стојат зад реакцијата на Европската комисија и ја поддржуваат нејзината позиција кон последните закани од САД.
Поддршка пристигна и од францускиот претседател Емануел Макрон, кој предупреди дека доведувањето во прашање на веќе потпишаните договори може да ги отвори вратите за поширока нестабилност во глобалната трговија. Според него, Европската унија мора да ги користи сите расположливи механизми за одговор доколку биде погодена со нови царини, нагласувајќи дека сојузници како ЕУ и САД треба да се фокусираат на соработка, а не на закани.
Иако реториката се заострува, Европската комисија засега останува на линија на воздржаност, повторувајќи дека сите опции се на маса, но без директно заострување на конфликтот со Белата куќа.
…
