Шпанските власти дадоа зелено светло крузерот „Хондиус“, на кој се регистрирани случаи на хантавирус и три смртни исходи, да се упати кон Канарските Острови, додека истовремено се води итна епидемиолошка истрага за можен пренос на инфекцијата меѓу луѓе на бродот.
Одлуката, како што соопшти Министерството за здравство во Мадрид, е донесена во тесна соработка со Светската здравствена организација и институциите на Европската Унија, а се темели на меѓународните здравствени протоколи и хуманитарни обврски. Според властите, станува збор за ситуација која бара координиран и брз одговор за да се заштитат и патниците и пошироката јавност.
Бродот, на кој се наоѓаат околу 150 патници и членови на екипажот, тргнал од јужниот дел на Аргентина и во моментов е закотвен во близина на островската држава Зелен ’Рт, крај западниот брег на Африка. Таму, експерти од Европскиот центар за превенција и контрола на болести спроведуваат проценка за да утврдат дали има лица кои мора итно да бидат евакуирани и медицински згрижени.
Според шпанското министерство, локалните капацитети на Зелен ’Рт не се доволни за справување со ваков здравствен инцидент, поради што Канарските Острови се определени како најсоодветна и најблиска безбедна дестинација за прием на бродот. Таму треба да се изврши детална медицинска проверка на сите патници и членови на екипажот, како и понатамошен третман и организација за нивно враќање во матичните земји.
Дополнително, еден од лекарите на бродот, кој е во критична состојба, ќе биде итно пренесен со авион на Канарските Острови за специјализирана медицинска нега. Шпанските власти нагласуваат дека пристаништето каде ќе се закотви „Хондиус“ сè уште не е прецизирано, но се очекува бродот да пристигне во рок од неколку дена.
…
