На крузерот „Хондиус“, кој плови под холандско знаме и во моментот е закотвен кај Зелено’ртските Острови, се развива ретка и загрижувачка здравствена ситуација што ја привлекува вниманието на Светската здравствена организација (СЗО). Според најновите информации, тројца патници починале, а уште неколку случаи се под сомнеж за инфекција со хантавирус, болест која вообичаено не се пренесува меѓу луѓе.
Меѓу жртвите се брачен пар од Холандија и еден државјанин на Германија. Вкупно, се проценува дека околу седум лица се заразени, додека лабораториските анализи сè уште траат и треба да дадат појасна слика за природата на избувнувањето.
На прес-конференција во Женева, епидемиологот на СЗО, Марија Ван Керхове, посочи дека постои можност за пренос од човек на човек во овој случај, особено ако станува збор за варијантата „Андес“, која претходно е поврзувана со таков начин на ширење. Таа нагласи дека истрагата сè уште е во тек и дека сите сценарија остануваат отворени: од можна изложеност пред качување на бродот, до заразување за време на крстарењето.
Првичните сомнежи укажуваат дека почетокот на синџирот на зараза можеби бил кај холандскиот брачен пар, кои би можеле да се инфицирале уште пред патувањето. Сепак, експертите не ја исклучуваат можноста вирусот да се проширил и во затворените простории на бродот, каде што блискиот контакт меѓу патниците може да игра улога, или пак преку контакт со контаминирана средина на некоја од екскурзиите за време на патувањето.
Од компанијата „Oceanwide Expeditions“, која го организира крстарењето, категорично тврдат дека на бродот нема присуство на стаорци. Бродот претходно пловел на релација од Аргентина кон Зелено’ртските Острови кога се појавиле првите симптоми кај патниците.
Холандските власти веќе преземаат координирани мерки за евакуација на заболeните и останатите патници и членови на екипажот, а операцијата се спроведува со приоритет поради сериозноста на состојбата. Според Министерството за надворешни работи на Холандија, тројца пациенти, меѓу кои и еден холандски државјанин, ќе бидат префрлени во својата матична земја за итен медицински третман. Дополнително, двајца членови на екипажот се во состојба што бара брза интервенција.
СЗО потсетува дека хантавирусот најчесто се пренесува преку контакт со измет или урина од заразени глодари, како и преку вдишување загадена прашина. Пренос од човек на човек е исклучително редок, што ја прави оваа ситуација на крузерот особено невообичаена и предмет на детална истрага.
…
