На регионалната конференција посветена на демографската отпорност, што денеска се одржа во Скопје, премиерот Христијан Мицкоски испрати порака дека државата се соочува со длабока демографска и општествена пресвртница, предупредувајќи дека иселувањето, падот на наталитетот и слабеењето на довербата во институциите повеќе не смеат да се набљудуваат како „суви статистички показатели“, туку како аларм за иднината на државата.
Во говор базиран на одговорноста на поединецот и односот кон државниот систем, Мицкоски оцени дека со години се креирале политики без суштинска стратегија, фокусирани на бројки наместо на луѓето. Според него, вистинската демографска обнова не започнува со административни мерки, туку со создавање чувство на припадност, перспектива и лична одговорност.
„Системот не е некој друг, системот сме сите ние“, порача премиерот, нагласувајќи дека не може истовремено да се очекуваат подобри услуги и институции, а притоа да се злоупотребуваат ресурсите и јавните фондови.
Посебен акцент стави на младите, кон кои упати директен апел иднината да не ја бараат надвор од земјата. Според него, краткорочната работа во странство и придонесувањето во туѓи економии не може да биде трајна животна стратегија ако паралелно се очекува домашниот систем да обезбеди сигурност, здравство и социјална заштита.
Мицкоски зборуваше и за, како што рече, неправдите што го разоруваат системот одвнатре: фиктивни прекувремени часови, злоупотреба на буџетски средства и однос во кој државата постојано се гледа како должник, а граѓаните како пасивни корисници.
Во дел од обраќањето, тој порача дека „дома треба да се сонува“, потенцирајќи дека иднината на државата може да се изгради само ако младите својата енергија, знаење и труд ги вложат во домашната економија.
Регионалната министерска конференција „Предводење на промените: Патеки кон демографска отпорност согласно потребите на луѓето“ се одржа во организација на Министерството за социјална политика, демографија и млади и УНФПА, под покровителство на Владата.
…
