Германско семејство добило судски спор откако проблемот со „резервирање“ лежалки со пешкири на хотелски базен на грчкиот остров Кос завршил на суд и резултирал со отштета од 986,70 евра за туристот.
Случајот се однесува на летување во август 2024 година, кога мажот, заедно со сопругата и двете деца, престојувал во хотел преку туристичка агенција. Иако правилата на сместувањето јасно забранувале оставање пешкири за однапред „заземање“ лежалки, практиката била широко распространета меѓу гостите, без реална интервенција од персоналот.
Туристот пред судот во Хановер опишал дека секој ден од одморот започнувал со фрустрирачка потрага по слободно место покрај базенот, која понекогаш траела и по дваесетина минути. Дури и станувањето во раните утрински часови, околу шест часот, не гарантирало дека ќе се најде лежалка, бидејќи тие веќе биле „обележани“ со пешкири.
Тој ја обвинил туристичката агенција дека не ја исполнила својата обврска да обезбеди почитување на правилата на хотелот и дека не презела мерки за да го спречи однесувањето кое било експлицитно забрането.
Судот во Хановер на крајот застанал на страната на туристот, оценувајќи дека организаторот на патувањето бил должен да реагира и да се погрижи правилата навистина да се применуваат во пракса. Иако за аранжманот семејството платило 1.786 евра, пресудата резултирала со делумен поврат на средства како компензација за нарушениот одмор.
…
